Óscar Fuertes premio da Bienal Española de Arquitectura e Urbanismo.

O importante valor das carpintarías de ribeira de Galicia traspasa as nosas fronteiras. O pasado xoves, 19 de xullo, o Arquitecto e autor do libro “La arquitectura de las carpinterías de ribera de Galicia” (Editado pola Xunta de Galicia) d. Óscar Fuertes Dopico, recolleu en Santander un dos premios da Bienal Española de Arquitectura e Urbanismo.

O arquitecto Óscar Fuertes estudou e investigou durante varios anos, para a súa tese doutoral, a arquitectura das carpintarías de ribeira de Galicia, dándolle a importancia arquitectónica e etnográfica que se merecían. Óscar Fuertes participou na edición pasada da Xuntanza de Embarcacións Tradicionais de Moaña cunha interesantísima conferencia, moi concorrida, sobre as Carpintarías de ribeira O seu traballo foi editado pola Xunta de Galicia o que nos vén amosar que tamén, no goberno galego do PP, hai variadas sensibilidades en contraposición á monolítica postura dos concelleiros do PP de Moaña, que apostaron sempre polo derrubo dos nosos estaleiros. Grazas que na consellería de Cultura e Educación atenderon a nosa petición de respectar e protexer estas instalacións senlleiras do noso patrimonio.

Os nosos parabéns a Óscar Fuertes por este novo premio, tan merecido polo seu traballo, que vén confirmar a nosa liña de traballo dende hai tempo.

Enhoraboa!!!

Vídeo da conferencia que  Óscar Fuertes nos ofreceu na Xuntanza do ano pasado.

Sueste - Las carpinterías de ribera en Galicia: La recuperación de sus arquitecturas.